A ANPA O Burgo denuncia o deterioro das instalacións do Conservatorio de Música de Culleredo
A ANPA O Burgo do Conservatorio Profesional de Música de Culleredo denuncia que, a partir de mediados de decembro, as instalacións están sen calefacción, situación que se suma á falta de mantemento nos últimos anos, creando un ambiente de ensino cada vez máis insostible. Expón a súa preocupación polo estado das instalacións e fai un chamamento ao Concello de Culleredo para que se adopten medidas urxentes para mellorar as condicións do centro.
A ANPA leva anos solicitando e reivindicando a mellora das instalacións do conservatorio, pero as súas demandas non foron atendidas de forma satisfactoria. Entre os problemas que afectan ao centro, destacan as constantes fugas de auga, que non se poden paliar cunha colocación estratéxica de cubos e cartóns nos corredores e nas aulas. Esta situación provoca un risco elevado de escorregamentos e caídas no mesmo nivel, o que pon en perigo a seguridade do alumnado e do profesorado.
Outro dos problemas graves que afectan ás instalacións é o estado do tellado, que acumula auga, creando o risco de desprendemento dos paneles superiores do teito, co perigo de que elementos caian sobre as persoas que se atopan no interior. A falta de mantemento tamén é evidente nas fendas que cada vez aparecen máis nos teitos e nas paredes, así como nas fiestras que filtran auga e necesitan a colocación de cartóns para evitalo.
Ademais, a humidade constante e a aparición de mofo son problemas que agravan a situación, xunto coa filtración de auga e a ausencia de calefacción. Estas condicións fan que as aulas e os corredores se volvan inseguros e insalubres para a comunidade educativa. A ANPA alerta tamén das dificultades que estas condicións poden causar no rendemento e concentración dos estudantes, facendo que as clases sexan moito máis difíciles de seguir.
A ANPA O Burgo esixe ao Concello de Culleredo que actúe de inmediato para solucionar esta situación intolerable. “Os nosos fillos e fillas merecen unhas condicións dignas e saudables para os seus estudos artísticos e musicais”, aseguran desde a asociación. Ademais, afirman que o Conservatorio Profesional de Música é un centro educativo oficial e de formación regulada, polo que non pode ser tratado con desdén nin descoido.