A abegondesa Irene Domínguez presentará no Concello o seu conto infantil ‘La perrita que no podía dormir’
O Concello de Abegondo incorporará a creación literaria local á súa axenda cultural coa presentación do libro infantil ‘La perrita que no podía dormir’, da escritora abegondesa Irene Domínguez Manteiga, veciña da parroquia de Orto. O acto terá lugar o xoves 11 de decembro, ás 12.00 horas, nas dependencias municipais.
A programación completarase ao día seguinte, o venres 12, cun contacontos na biblioteca municipal, tamén a cargo de Domínguez, dirixido ao público infantil. Durante a sesión, os nenos e nenas poderán escoitar a historia da protagonista e, ademais, estarán dispoñibles exemplares do libro para quen desexe mercalo e levalo asinado pola autora.
‘La perrita que no podía dormir’ é un álbum ilustrado editado por Apuleyo Ediciones, publicado en tapa dura e cun total de 36 páxinas a toda cor. Trátase dunha das novidades do catálogo infantil de maio de 2025 da editorial onubense, pensado especialmente para o público de primeiros lectores, arredor dos 5 e 6 anos.
No conto, a protagonista é Faíscas (Chispas na versión en castelán), unha cadeliña con enormes orellas e un olfacto moi desenvolvido que ten dificultades para conciliar o sono por culpa dos cheiros que lle chegan constantemente. A proposta do libro convida os máis pequenos a acompañar a cadeliña na procura do que lle impide durmir, nun relato que mestura humor, tenrura e misterio adaptado á infancia.
Segundo recolle a ficha da obra, a historia enmárcase nos contidos de amizade, relación cos animais de compañía e cuestións persoais e sociais propias da etapa infantil, o que converte o álbum nun recurso útil para traballar coas familias e nas aulas aspectos como o medo á noite, as rutinas de descanso e a xestión das emocións.
O Concello de Abegondo destaca que a iniciativa permite dar visibilidade ao talento literario do municipio e, ao mesmo tempo, reforzar as actividades de fomento da lectura entre a rapazada, ofrecendo espazos de encontro directo entre autores e público infantil.