O TSXG anula tres artigos da ordenanza de mobilidade da Coruña ao considerar que discriminan aos VTC fronte ao taxi
O Tribunal Superior de Xustiza de Galicia (TSXG) declarou nulos os artigos 20.2, 70.6 e 73 da Ordenanza de Mobilidade Sostible do Concello da Coruña, aprobada o 11 de setembro de 2025, ao entender que vulneran a liberdade de empresa e establecen un trato discriminatorio cara aos vehículos de turismo con condutor (VTC) respecto do servizo de taxi.
A resolución xudicial estima a demanda presentada por Enol Mobility contra o Concello da Coruña e a Asociación Local de Traballadores Autónomos de Auto Taxis Clase A.
Na sentenza, a Sala considera que o artigo 73 supón, na práctica, unha prohibición total e indefinida da actividade dos VTC ata a aprobación dunha futura ordenanza específica. Os maxistrados entenden que esta medida resulta desproporcionada e vulnera tanto a liberdade de establecemento como a libre prestación de servizos recollidas no dereito da Unión Europea e na Constitución.
O tribunal advirte de que “unha prohibición, aínda que sexa de forma indirecta, deste tenor é inadmisible dentro do ámbito da Unión Europea, en que se establece un espazo sen fronteiras interiores, en que a libre circulación de mercancías, persoas, servizos e capitais estará garantida de acordo coas disposicións dos tratados”. Ademais, engade que “de establecerse e manterse a norma implica, de facto establecer, un monopolio de transporte de viaxantes a favor do taxi, cando ambas actividades son económicas e, por iso, conculca de forma directa a libre competencia”.
Os maxistrados lembran tamén que “en concreto, en aplicación a este caso, atopámonos con que para o exercicio das devanditas actividades económicas é relevante tanto a liberdade de establecemento como a libre prestación de servizos, ao amparo dos artigos 49 e 56 do tratado fundacional”.
En relación cos artigos 20.2 e 70.6, a Sala sinala que os servizos VTC contan cun marco regulador específico, polo que non se pode impedir o desenvolvemento da súa actividade económica. Segundo recolle a sentenza, “non debemos esquecer que os servizos VTC están regulados, polo que non se pode impedir a súa actividade económica, e no texto destes preceptos existe un fondo discriminatorio da actividade en relación á limitación fronte á actividade de taxi”.
Así mesmo, conclúe que “impedir que poidan os VTC recoller ou deixar a un pasaxeiro en zona de baixa emisión, diferenciando esta actividade fronte á de taxi, sen expoñer motivación algunha, é un trato inmotivado e, por iso, discriminatorio, que provoca unha restrición de liberdade de empresa que comporta a anulación dos devanditos preceptos”.
A resolución xudicial non é firme e pode ser recorrida ante o Tribunal Supremo.